Halló, ég heiti Adrienn frá Ungverjalandi. Ég er mjög ánægð að hafa fengið tækifæri til að vera hluti af þessum leikskóla umkringd ótrúlegum krökkum. Þau eru framtíð okkar og mig langar að hvetja þau þannig að ekkert sé ómögulegt, trúa á sjálfa sig að þau geti verið allt sem þau vilja vera, virða hvert annað og náttúruna. Ég elska að mála, fallhlífastökk, gönguferðir og ég elska að kenna jóga!

Ég kom til Íslands í lok árs 2012 og hef búið hér síðan. Ég er mamma sex ára stráks og þar sem hann er með einhverfu hef ég sérstakan áhuga á rannsóknum sem tengjast einhverfu. Ég er að læra félagsvísindi í HA og stefni á að hefja meistaranám í haust.

Ég heiti Anna Karen og er 21 árs. Ég er fædd og uppalin í Danmörku, enn síðustu 3 árin hef ég verið búsett á Íslandi, unnið á leikskólanum Sjálandi og spilað handbolta með meistaraflokk Stjörnunnar.

Hóf starfsferil í leikskóla árið 2001 þá 21 árs. Hef starfað í fjórum leikskólum í Garðabæ samhliða námi og barnauppeldi síðan þá. Fékk Grunnskólakennararéttindi árið 2005 og Montessori kennsluréttindi árið 2009. Hóf störf í leikskólanum Sjálandi haustið 2010 og hef verið kjarnastjóri á flestum kjörnum ásamt listakjarna. Útskrifaðist með Meistaragráðu í Leikskólakennarafræði árið 2015 eftir að ég áttaði mig loks á því að ég vil hvergi annarsstaðar vera.

Ég er búin að vera að vinna á Sjálandi í um það bil eitt og hálft ár og leið ekki á löngu þar til ég áttaði mig á að þarna lægi áhugasvið mitt, í kringum börn. Í kjölfarið skráði ég mig í Uppeldis- og menntunarfræði við Háskóla Íslands og er núna á mínu fyrsta ári þar. Þar að auki er handbolti mitt helsta áhugamál og spila ég í dag með ÍR en ég fór þangað úr Stjörnunni sem ég spilaði með síðustu þrjú ár.

Árið 2014 hóf ég starfsferil minn á leikskóla og hefur áhugi minn á starfi með börnum eingöngu aukist síðan þá. Ég hafði lengi heillast af leikskólaumhverfinu en ásamt því að vinna á leikskóla hef ég unnið ýmist fjölbreytt starf með börnum á öllum aldri. Því fannst mér við hæfi að skrá mig nám tengt því og varð Uppeldis- og menntunarfræði við Háskóla Íslands fyrir valinu og útskrifaðist ég þaðan sumarið 2022.

Hef starfað á leikskólanum síðan sumarið 2020, bæði í hlutastarfi og einnig í fullu starfi. Útskrifaðist með B.A. í félagsráðgjöf vorið 2021 og starfaði fram að fæðingarorlofi. Kom svo aftur til starfa haustið 2022 og finnst fátt skemmtilegra en að starfa með börnum.

Ég ólst upp í Garðabæ og spilaði lengi með Stjörnunni í hand- og fótbolta. Útskrifaðist 1995 sem grunnskólakennari með íþróttir sem valfag. Árið 2006 flutti ég á Laugarvatn til að ná mér í framhaldsskólaréttindi í íþróttafræðum. Eftir það ákvað ég að fara í meistaranám sem ég kláraði tveimur árum seinna. Ég hef kennt ólík fög á öllum skólastigum og er svo heppin að hafa samhliða vinnu náð að mennta mig í ýmsu er snýr að menntun barna. Mér finnst börn ákaflega dýrmæt og veit hve mikilvægt er að hlúa vel að þeim. Ég er svo heppin að eiga tvær dætur og tvær ömmustelpur sem gefa lífi mínu enn meira gildi. Ég byrjaði í þessu starfi haustið 2022 og finnst ákaflega gott að starfa á þessum vinnustað. Þegar unnið er með börnum er enginn dagur eins og það er einn af kostunum við að vinna með þeim fyrir utan það hve mikið þau kenna mér á hverjum degi.

Hæhæ! Ég er fædd og uppalin í Garðabæ og hef búið þar allt mitt líf að undanskildum tveimur sumrum þegar ég bjó í Suður Kaliforníu. Ég hef alla tíð haft mjög gaman af börnum og var aðeins 10 ára þegar ég byrjaði að taka að mér að passa börnin í hverfinu. Undanfarin 2-3 ár hef ég verið í námi að bæta við mig þekkingu til að geta hafið nám við HÍ í leikskólakennarafræði. Ég hef starfað á leikskólanum Sjálandi síðan vorið 2012. Ég hef alla tíð elskað að syngja og dansa og kenni ég einnig dans samhliða leikskólastarfinu. Ég elska að fá að starfa við það sem er svo gefandi, lærdómsríkt og skemmtilegt, eins og það að kenna, hvort sem það er í leikskólanum eða dansinn. Lærdómurinn sem maður öðlast í gegnum samskipti við börnin er ekki síður ávinningur starfsins.

Ég er fæddur og uppalinn á Selfossi. Útskrifaðist með B.S. gráðu í næringarfræði frá Háskóla Íslands árið 2020. Hef brennandi áhuga á íþróttum, hreyfingu og heilsu. Ég byrjaði að vinna á Sjálandi í nóvember 2022 en ásamt því spila ég handbolta með Stjörnunni. Ef það eru tvö ráð sem ég ætti að gefa öllum þá er það að drekka nóg af vatni og vera í góðum skóm. (Jón Gnarr)

Útskrifaðist frá HÍ árið 2009 með B.sc. í íþrótta- og heilsufræði og er með kennsluréttindi á grunn- og framhaldsskólastigi. Kenndi börnum á grunnskólaaldri í nokkur ár en leikskólastigið heillaði alltaf. Síðan haustið 2019 hef ég starfað í leikskóla og mun klára framhaldsnám í Menntunarfræðum leikskóla í vor samhliða starfinu.

Hæ! Ég heiti Inga og ég er frá Lettlandi. Ég flutti til Íslands árið 2009 og hef unnið á Sjálandi í 10 ár. Ég byrjaði að vinna sem matráður hér í Sjálandi árið 2016, en vann inn á kjörnum áður fyrr. Ég útskrifaðist úr Menntaskólanum í Kópavogi úr Matartækna- og matsveinanámi árið 2019. Mér finnst gaman að ferðast, að fara í göngutúra og eyða tíma með fjölskyldunni.

Ég fæddist í Litháen og ég hef verið á Íslandi frá árinu 2006. Ég hef reynslu af að vinna með unglingum í Litháen. Ég útskrifaðast með BA í sálfræði frá Vilnius Pedagogical University árið 2007 og hef unnið í leikskólanum Sjálandi frá árinu 2008. Ég kláraði kennsluréttindi til að kenna á Íslandi árið 2010. Ég starfaði í grunnskóla í þrjú ár en hef starfað sem sérkennari í leikskólanum Sjálandi frá 2019. Ég nýt þess að fá þessa reynslu og tækifæri til að bæta mig á hverjum degi og er alltaf í góðu skapi að því að það er svo gaman að vinna með börnum. Móttó lífsins: Gerðu í dag allt sem þú getur í stað þess að bíða með það fram til morguns.

Hef starfað á leikskólanum síðan vorið 2020, fyrst í fullu starfi og núna í hlutastarfi samhliða námi í grunnskólakennarafræðum, Mér finnst starf með börnum mjög gefandi og ég elska ferðalög og útivist í mínum frítíma.

Stefndi alltaf á að vera lögfræðingur þó svo að kennaranámið heillaði alltaf. Hætti í lögfræðináminu og skráði mig í kennaranám. Útskrifaðist frá HA með B.Ed. í Kennarafræðum árið 2020. Hef margra ára reynslu af leikskólastörfum, sem leiddi til stefnubreytingar. Mun ljúka námi við HA á menntavísindasviði með master í „Kennslu á leikskólastigi“ um áramótin ´23/´24. Langar að stefna á frekari nám við menntavísindasvið eftir útskrift.

Ég heiti María Björt og byrjaði að starfa hér í ágúst 2022 eftir að hafa starfað með börnum á sumarnámskeiðum. Ég er stúdent af textíl og fatahönnunarbraut í FG. Ég elska að vera með börnunum og veita þeim hlýju. Skemmtilegast finnst mér að leyfa börnunum að njóta þess að vera í skapandi leik, þar læra þau svo margt.

Ég kem frá norðurhluta Póllands. Flutti enn norðar, til Íslands, haustið 2017. Ég er sérkennaramenntuð og ég trúi því að hvert barn sé einstaklingur sem á skilið ástríkt, öruggt og hvetjandi umhverfi þar sem það getur þroskast á sinn hátt. Þegar ég á frí þá er ég með fjölskyldunni minni eða fer í jóga, ferðalög og leikhús.

Ég er fædd og uppalin í Póllandi og útskrifaðist með MA-gráðu í uppeldis- og menntunarfræði, frá Vistula University í Varsjá. Ég byrjaði að vinna í Sjálandi í nóvember 2018 og vinn núna sem stuðningur inn á kjarna. Mér líkar mjög vel við starfið mitt, það veitir mér gleði. Ég hef mikinn áhuga á bókmenntum, sérstaklega íslenskum ævisögum og mér finnst gaman að ferðast til útlanda.

Ég útskrifaðist sem stúdent úr Flensborg og hef hafið nám í Kennaraháskólanum í leikskólakennarafræði. Ég hef alltaf haft mikinn áhuga á börnum og því er þetta starf mér mjög kært. Það er alltaf gleði að mæta í vinnuna.

Ég heiti Sigríður Einarsdóttir og er alltaf kölluð Sirrý. Ég er 46 ára og á 3 börn. Hef unnið með börnum síðan 1997, bæði í leikskólum og grunnskóla.

Ég heiti Ven og er frá Úkraínu. Ég og konan mín fluttum til Íslands árið 2020 og verð ég hrifnari og hrifnari af landinu því lengur sem ég dvel hérna. Áður en ég flutti til Íslands bjó ég og starfaði sem kennari í Beijing, Kína í næstum fjögur ár. Ákvörðunin að halda áfram að starfa með börnum var mér auðveld þar sem ég nýt hvers dags í slíku starfi. Áhugamálin mín eru einnig ljósmyndun, hjólreiðar, fjallgöngur, veiði og lestur.

Ég er kölluð Selina og ég kem frá Kína. Ég hef unnið hér síðan 2015. Áhugamál mín eru að ferðast um heiminn og kynnast fjölbreyttri matarmenningu.